ઝારખંડ વિધાનસભા ચૂંટણીઃ આજે ભાજપની કેન્દ્રીય ચૂંટણી સમિતિની બેઠક, PM મોદી પણ થશે સામેલ

ઝારખંડમાં યોજાનારી વિધાનસભાની ચૂંટણીને લઈને આજે દિલ્હીમાં ભારતીય જનતા પાર્ટી (BJP)ની કેન્દ્રીય ચૂંટણી સમિતિની બેઠક યોજાશે. આ બેઠકમાં ઝારખંડ વિધાનસભાના ઉમેદવારોના નામ નક્કી કરવામાં આવશે. વડા પ્રધાન નરેન્દ્ર મોદી, ગૃહ પ્રધાન અમિત શાહ, સંરક્ષણ પ્રધાન રાજનાથ સિંહ, ભાજપ અધ્યક્ષ જેપી નડ્ડા અને કેન્દ્રીય ચૂંટણી સમિતિના તમામ સભ્યો ઝારખંડ કોર ગ્રૂપના નેતાઓ સાથે બેઠકમાં ભાગ લેશે. ઝારખંડના ચૂંટણી પ્રભારી શિવરાજ સિંહ અને સહ પ્રભારી હિમંતા બિસ્વા સરમા પણ હાજર રહેશે.

અગાઉ સોમવારે ઝારખંડ વિધાનસભા ચૂંટણી માટે ભાજપના પ્રભારી અને આસામના મુખ્યમંત્રી હિમંતા બિસ્વા સરમાએ ચૂંટણી સમિતિની બેઠક યોજી હતી. તેમણે કહ્યું કે એનડીએ સહયોગીઓ વચ્ચે સીટ વહેંચણીની ગોઠવણ લગભગ અંતિમ છે અને ચૂંટણીની જાહેરાતના 48 કલાકની અંદર ઉમેદવારોની પ્રથમ યાદી જાહેર કરવામાં આવશે.

સીએમ સરમાએ કહ્યું કે સીટ વહેંચણી અંગેની સમજૂતી મુજબ સુદેશ મહતોના નેતૃત્વમાં AJSU પાર્ટી 9-11 સીટો પર ચૂંટણી લડશે. તેમણે કહ્યું કે AJSU પાર્ટી સાથે સીટ વહેંચણી પર વાતચીત લગભગ અંતિમ છે. એક સીટને લઈને થોડી સમસ્યા છે. અમે તેનું નિરાકરણ કરીશું.

તેમણે કહ્યું કે નીતીશ કુમારનું જનતા દળ (યુનાઈટેડ) બે વિધાનસભા બેઠકો પર ચૂંટણી લડશે, જ્યારે પક્ષના અધ્યક્ષ ચિરાગ પાસવાન વિદેશથી પરત ફર્યા બાદ લોક જનશક્તિ પાર્ટી (રામ વિલાસ) સાથે બેઠક વહેંચણીની વાતચીત બુધવાર અથવા ગુરુવારે થશે. ભાજપના નેતાએ કહ્યું કે પાંચ-છ બેઠકો સિવાય લગભગ તમામ બેઠકો માટે ઉમેદવારોના નામ ફાઈનલ થઈ ગયા છે. તેમણે કહ્યું કે બાકીના નામો પર પણ ટૂંક સમયમાં નિર્ણય લેવામાં આવશે.

હિમંતા બિસ્વા સરમાએ કહ્યું કે આજે ફરી એકવાર ચૂંટણી સમિતિની બેઠક મળશે, ત્યારબાદ પાર્ટીના સંસદીય બોર્ડની બેઠક મળશે. 81 સભ્યોની ઝારખંડ વિધાનસભા માટે આ વર્ષે ચૂંટણી યોજાવાની છે. વર્તમાન વિધાનસભાનો કાર્યકાળ 5 જાન્યુઆરી, 2025ના રોજ સમાપ્ત થશે.