કેદારનાથમાં ફરી વાદળ ફાટ્યું, ભારે વરસાદ વચ્ચે 200 તીર્થયાત્રીઓ ફસાયા, રેસ્ક્યૂ ઓપરેશન શરુ

ભારે વરસાદને કારણે ગૌરીકુંડ-કેદારનાથ રોડ પર પૂર આવ્યું છે, જેના કારણે બજારો અને હોટલ ખાલી કરાવવી પડી છે. અધિકારીઓ પાસેથી મળેલી માહિતી મુજબ કેદારનાથ ધામમાં લગભગ 200 શ્રદ્ધાળુઓ ફસાયા હોવાની આશંકા છે.

samay mirror

August 01, 2024

1 minute

નેશનલ

કેરળ બાદ હવે ઉત્તરાખંડમાં પણ ભારે વરસાદ પડી રહ્યો છે. કેદારનાથ રોડ પર વરસાદને કારણે ભીમ બાલી અને લિંચોલી વચ્ચે પથ્થરો પડવાની માહિતી મળી છે. ગૌરીકુંડમાં મંદાકિનીનું જળસ્તર વધી ગયું છે. આ સિવાય સોનપ્રયાગમાં પણ પાણીનું સ્તર વધ્યું છે. જોકે ટીમને એલર્ટ મોડ પર રાખવામાં આવી છે. સોનપ્રયાગ અને ગૌરીકુંડ સહિત અનેક સ્થળોએ વીજ પુરવઠો ખોરવાઈ ગયો છે. આવી સ્થિતિમાં અહીં રોકાતા મુસાફરોની મુશ્કેલી વધી છે.

સાવચેતીના પગલા તરીકે, અધિકારીઓએ અસરગ્રસ્ત વિસ્તારોમાં બજારો અને હોટલો ખાલી કરાવી. આ ઉપરાંત નદી કિનારે આવેલી ઈમારતોને ખાલી કરાવવામાં આવી છે અને વહીવટીતંત્ર પરિસ્થિતિ પર ચાંપતી નજર રાખી રહ્યું છે. કેદારનાથ ધામમાં લગભગ 200 શ્રદ્ધાળુઓ ફસાયા હોવાની આશંકા છે. કેદારનાથ તેમજ રૂદ્રપ્રયાગ જિલ્લામાં વરસાદ પડી રહ્યો છે. વરસાદના કારણે કેદારનાથ હાઈવે પણ જોખમમાં છે. વરસાદના કારણે પ્રશાસને શ્રદ્ધાળુઓને સુરક્ષિત સ્થળોએ રોકી દીધા છે.

આ સિવાય પૂર જેવી સ્થિતિને જોતા રૂદ્રપ્રયાગના જિલ્લા મેજિસ્ટ્રેટે યાત્રાને રોકી દીધી છે. પ્રશાસને મંદાકિની નદીના કિનારે લોકોને મદદ કરવા અને તેમની સુરક્ષા સુનિશ્ચિત કરવા માટે NDRFના જવાનોને તૈનાત કર્યા છે. અધિકારીઓએ ગૌરીકુંડના રહેવાસીઓને પણ સતર્ક રહેવાની ચેતવણી આપી છે. હવામાન વિભાગના જણાવ્યા અનુસાર, આગામી બે દિવસ સુધી ઘણી જગ્યાએ ભારે વરસાદ પડી શકે છે, જેના કારણે લોકોને મુશ્કેલીનો સામનો કરવો પડી શકે છે.

ગંગોત્રી ધામમાં ભાગીરથીની જળ સપાટીમાં અચાનક વધારો થયો છે. આના થોડા દિવસો પહેલા ભાગીરથીના પાણીના સ્તરમાં વધારો થયો હતો, જેના કારણે લોકોને મુશ્કેલીનો સામનો કરવો પડ્યો હતો. જો કે નદીનું પાણી હજુ ઘાટની ઉપર પહોંચ્યું નથી, પરંતુ પાણીનું સ્તર વધવાથી લોકો માટે જોખમ ઊભું થઈ શકે છે.

આ ઉપરાંત હવામાન વિભાગે આગામી 48 કલાક માટે ઉત્તરાખંડના 7 જિલ્લામાં ભારેથી અતિ ભારે વરસાદ થવાનું રેડ એલર્ટ પણ જાહેર કર્યું છે. ચેતવણીમાં કહેવામાં આવ્યું છે કે દહેરાદુન, પૌડી, નૈનીતાલ, હરિદ્વાર, ચંપાવત સહિતના જિલ્લામાં ભારેથી અતિભારે વરસાદ થઈ શકે છે