જમ્મુ-કાશ્મીર: પાકિસ્તાને LoC પર સતત છઠ્ઠા દિવસે કર્યું યુદ્ધવિરામનું ઉલ્લંઘ, ભારતીય સેનાએ આપ્યો જવાબ

પાકિસ્તાની સેનાએ ફરી એકવાર સરહદ પર યુદ્ધવિરામનું ઉલ્લંઘન કર્યું છે. સતત છઠ્ઠા દિવસે પણ તેમની તરફથી ગોળીબાર ચાલુ રહ્યો પાકિસ્તાની સેનાની ચોકીઓએ જમ્મુ અને કાશ્મીરના નૌશેરા, સુંદરબની અને અખનૂર સેક્ટરમાં નિયંત્રણ રેખા પાર ઉશ્કેરણીજનક ગોળીબાર કર્યો. આ ઉપરાંત, બારામુલ્લા અને કુપવાડા જિલ્લાઓ તેમજ પરગલ સેક્ટરમાં આંતરરાષ્ટ્રીય સરહદ પારથી ગોળીબાર થયો હતો.

ભારતીય સેનાના જવાનોએ પાકિસ્તાની સેનાને યોગ્ય જવાબ આપ્યો. બંને દેશો વચ્ચે તણાવના સમયે આવી ગોળીબારની ઘટનાઓ બની રહી છે. પહેલગામમાં થયેલા આતંકવાદી હુમલા બાદ ભારત દ્વારા પાકિસ્તાન વિરુદ્ધ સતત નિર્ણયો લેવામાં આવી રહ્યા છે. તાજેતરમાં, ભારતમાં ઘણા પાકિસ્તાની પત્રકારો, ક્રિકેટરો અને સંરક્ષણ પ્રધાન ખ્વાજા આસિફના સોશિયલ મીડિયા એકાઉન્ટ્સ બ્લોક કરવામાં આવ્યા હતા.

પ્રધાનમંત્રી નરેન્દ્ર મોદીએ મંગળવારે ભારતીય સશસ્ત્ર દળોને પહેલગામ આતંકવાદી હુમલાનો જવાબ આપવાની રીત, લક્ષ્ય અને સમય નક્કી કરવાની સંપૂર્ણ સ્વતંત્રતા આપી હતી. કેન્દ્રીય સંરક્ષણ પ્રધાન રાજનાથ સિંહ, ચીફ ઓફ ડિફેન્સ સ્ટાફ (CDS) અનિલ ચૌહાણ અને ત્રણેય સશસ્ત્ર દળોના વડાઓએ ઉચ્ચ સ્તરીય બેઠકમાં હાજરી આપી હતી.

પીએમ મોદીએ ભારતીય સશસ્ત્ર દળોની ક્ષમતાઓમાં સંપૂર્ણ વિશ્વાસ વ્યક્ત કર્યો. પ્રધાનમંત્રીએ કહ્યું કે તેમને આપણા પ્રતિભાવની રીત, લક્ષ્ય અને સમય નક્કી કરવાની સંપૂર્ણ સ્વતંત્રતા છે.

પાકિસ્તાન નજીકની સરહદોની સુરક્ષા BSF ની દેખરેખ હેઠળ

આ ઉચ્ચ-સ્તરીય બેઠક 22 એપ્રિલે જમ્મુ અને કાશ્મીરમાં થયેલા આતંકવાદી હુમલાના પગલે યોજાઈ છે. આ બેઠકમાં ભાગ લેનાર દરેક દળ ભારતની સરહદ અને આંતરિક સુરક્ષા માળખામાં મહત્વપૂર્ણ ભૂમિકા ભજવે છે. બીએસએફને પાકિસ્તાન અને બાંગ્લાદેશ સાથેની સરહદોની રક્ષા કરવાનું કામ સોંપવામાં આવ્યું છે, જ્યારે એસએસબી નેપાળ અને બાંગ્લાદેશ સાથેની સરહદોની રક્ષા કરે છે. આસામ રાઇફલ્સ મ્યાનમાર સાથેની સરહદનું રક્ષણ કરે છે અને NSG ભારતનું મુખ્ય આતંકવાદ વિરોધી સંરક્ષણ દળ છે.

પહેલગામ હુમલા પછી પીએમ મોદી આજે પહેલી કેબિનેટ બેઠક કરશે. આ બેઠક પહેલા તેઓ ત્રણ મહત્વપૂર્ણ સમિતિઓની અધ્યક્ષતા પણ સંભાળશે. પહેલગામ હુમલા પછી, ભારતમાં ઉચ્ચ-સ્તરીય બેઠકોની શ્રેણી ચાલી રહી છે.