સૈફ અલી ખાન પર હુમલા બાદ સ્ટાર્સનું રીએક્શન આવ્યું સામે, પૂજા ભટ્ટ-જુનિયર NTRએ કાયદો અને વ્યવસ્થા પર ઉઠાવ્યા સવાલ

જાણીતા ફિલ્મ અભિનેતા સૈફ અલી ખાન પર છરી વડે હુમલો કરી દેવાની ઘટના સામે આવી છે.. ઘાયલ અભિનેતાને સારવાર માટે લીલાવતી હોસ્પિટલમાં દાખલ કરવામાં આવ્યા છે. ક્રાઈમ બ્રાન્ચની ટીમ અભિનેતાના ઘરની આસપાસના સીસીટીવી ફૂટેજની તપાસ કરી રહી છે અને ટીમ સંપૂર્ણ તપાસ દ્વારા આ હુમલા પાછળ કોણ છે તે શોધવાનો પ્રયાસ કરી રહી છે. આ મામલે ચાહકો અને સેલેબ્સની પ્રતિક્રિયાઓ સામે આવી રહી છે અને તેઓ આ મામલે પોતાનો ગુસ્સો વ્યક્ત કરી રહ્યા છે. આ અંગે અભિનેત્રી પૂજા ભટ્ટ અને જુનિયર એનટીઆરની પ્રતિક્રિયા સામે આવી છે.

પૂજા ભટ્ટે આ બાબતે X અને ઇન્સ્ટાગ્રામ બંને પર પ્રતિક્રિયા આપી છે. અભિનેત્રીએ ઇન્સ્ટા પર એક પોસ્ટ શેર કરી છે, જેમાં લખ્યું છે કે સૈફ અલી ખાન પર હુમલો થયો છે અને તે હોસ્પિટલમાં દાખલ છે. આ પોસ્ટ શેર કરતાં પૂજાએ મુંબઈ પોલીસને ટેગ કરીને લખ્યું, "મુંબઈ પોલીસ કૃપા કરીને મુંબઈ, ખાસ કરીને બાંદ્રાને ફરીથી સુરક્ષિત બનાવો."

પૂજા ભટ્ટે કાયદો અને વ્યવસ્થા પર સવાલો ઉઠાવ્યા

પૂજાએ ઇન્સ્ટા પર બીજી એક સ્ટોરી શેર કરી છે, જેમાં તેણે લખ્યું છે કે, “કોઈપણ ઘટના પછી, સ્થાનિક પોલીસ સૌથી પહેલા આપણો બચાવ કરે છે. ગુનેગારો આટલી સરળતાથી કોઈ ગુનો ન કરી શકે તેવો માહોલ બનાવવાનું તેમનું કર્તવ્ય છે. બીટ ઓફિસરે આવી ઘટનાઓને રોકવાનો પ્રયાસ કરવો જોઈએ. આ ઉપરાંત, પૂજા ભટ્ટે X પર પણ પોસ્ટ કરી હતી, જ્યાં તેણીએ કાયદો અને વ્યવસ્થા પર પ્રશ્નો ઉઠાવ્યા હતા. અભિનેત્રીએ લખ્યું, “કાયદો અને વ્યવસ્થા. આપણી પાસે કાયદો છે, પણ સિસ્ટમનું શું?

જુનિયર એનટીઆરએ પણ દુઃખ વ્યક્ત કર્યું

બીજી એક પોસ્ટમાં, પૂજા ભટ્ટે મુંબઈ પોલીસને ટેગ કરી અને સુરક્ષા પર પ્રશ્નો ઉઠાવ્યા અને પૂછ્યું, "શું આ અરાજકતાને રોકી શકાય?" બાંદ્રામાં વધુ પોલીસની જરૂર છે. ખાસ કરીને ઉપનગરોની રાણીએ પહેલાં ક્યારેય આટલું અસુરક્ષિત અનુભવ્યું નથી. કૃપા કરીને ધ્યાન આપો. આ સાથે તેમણે દેવેન્દ્ર ફડણવીસ અને અજિત પવારને પણ ટેગ કર્યા છે. જ્યારે જુનિયર એનટીઆરએ ઇન્સ્ટાગ્રામ પર લખ્યું, “સૈફ સર પર હુમલા વિશે સાંભળીને આઘાત અને દુઃખ થયું. હું તેમના ઝડપી સ્વસ્થતા અને સારા સ્વાસ્થ્યની કામના કરું છું.