મણિપુરમાં ફરી હિંસા, કાંગપોકપી જિલ્લામાં ટોળાના હુમલામાં પોલીસ અધિક્ષક ઈજાગ્રસ્ત, સુરક્ષા દળોને હટાવવાની કરી રહ્યા છે માંગ

મણિપુરમાં હિંસા અટકવાનું નામ નથી લઈ રહી. રાજ્યના કાંગપોકપી જિલ્લામાં એક ટોળાએ પોલીસ અધિક્ષકની ઓફિસ પર હુમલો કર્યો છે. પોલીસ અધિક્ષક એમ પ્રભાકરને કપાળ પર કોઈ વસ્તુ વાગવાથી ઈજા થઈ હતી અને તેમને હોસ્પિટલમાં લઈ જવામાં આવ્યા હતા, એમ એક અધિકારીએ જણાવ્યું હતું. આ ઘટનામાં ઘાયલ થયેલા અન્ય ઘણા લોકોને પણ હોસ્પિટલમાં લઈ જવામાં આવ્યા હતા. પરિસ્થિતિને કાબૂમાં લેવા માટે વધારાના કેન્દ્રીય દળોને સ્થળ પર મોકલવામાં આવ્યા હતા.

અધિકારીઓએ જણાવ્યું કે શુક્રવારે સાંજે મણિપુરના કાંગપોકપી જિલ્લામાં એક ટોળાએ પોલીસ અધિક્ષકની ઓફિસ પર હુમલો કર્યો હતો. હુમલાખોરો ગામમાંથી કેન્દ્રીય દળોને હટાવવાની માંગ કરી રહ્યા હતા. પોલીસે દેખાવકારોને વિખેરવા માટે ટીયર ગેસના શેલ છોડ્યા હતા. આમાં ઘણા ઘાયલ થયા છે.

અધિકારીઓનું કહેવું છે કે મણિપુરના કાંગપોકપી જિલ્લાના એક ગામમાંથી કેન્દ્રીય દળોને હટાવવાના કારણે ટોળાએ પોલીસ અધિક્ષક કચેરી પર હુમલો કર્યો હતો. આ પછી પોલીસે ટીયર ગેસના સેલ છોડ્યા હતા.

પોલીસ પાસેથી મળેલી માહિતી મુજબ, સુરક્ષા દળો દ્વારા મહિલાઓ પર કથિત લાઠીચાર્જના વિરોધમાં કુકી સંગઠનો 31 ડિસેમ્બરે સાયબોલ ગામમાં વિરોધ પ્રદર્શન કરી રહ્યા છે.

કેન્દ્રીય દળોને પાછા ખેંચવાની માંગને લઈને હોબાળો

એક અધિકારીએ જણાવ્યું કે ગામમાં કેન્દ્રીય દળો, ખાસ કરીને BSF અને CRPFની સતત તૈનાતી પર પોતાનો ગુસ્સો વ્યક્ત કરવા હુમલાખોરોએ ઓફિસ તરફ પથ્થરો અને અન્ય હથિયારો ફેંક્યા. એસપી કચેરીના પ્રાંગણમાં રાખવામાં આવેલા જિલ્લા પોલીસના વાહનોને નુકસાન થયું હતું.

શુક્રવારે સાંજે મણિપુરના કુકી પ્રભુત્વવાળા કાંગપોકપી જિલ્લામાં તણાવ પ્રવર્તી રહ્યો હતો કારણ કે વિરોધીઓએ ઇમ્ફાલ પશ્ચિમની સરહદે આવેલા કાંગપોકપી જિલ્લામાં ઉયોકચિંગ ખાતે તૈનાત સુરક્ષા દળોને પાછા ખેંચવાની માંગ કરી હતી.વિરોધીઓએ શુક્રવારે સાંજે કાંગપોકપી પોલીસ સ્ટેશન પર હુમલો કર્યો, પથ્થરમારો કર્યો અને સુરક્ષા દળોને પાછા ખેંચવાની માંગ કરી.