જલગાંવ રેલ અકસ્માત: આગની અફવાને કારણે ભાગદોડ, 13 લોકોના મોત, પીએમ મોદીએ શોક કર્યો વ્યક્ત

બુધવારે સાંજે મહારાષ્ટ્રના જલગાંવ જિલ્લામાં મુંબઈ પુષ્પક એક્સપ્રેસ ટ્રેનમાં આગ લાગવાની અફવા ફેલાતા મુસાફરોમાં ભાગદોડ મચી ગઈ હતી. ટ્રેનમાં મુસાફરી કરી રહેલા મુસાફરો આગના ડરથી ઉતાવળમાં બાજુના પાટા પર કૂદવા લાગ્યા. આ સમય દરમિયાન બીજી ટ્રેન વિરુદ્ધ દિશામાંથી આવી રહી હતી. આવી સ્થિતિમાં, કેટલાક મુસાફરો તે ટ્રેનની ચપેટમાં આવી ગયા. અધિકારીઓએ માહિતી આપી છે કે આ અકસ્માતમાં ૧૩ મુસાફરોના મોત થયા છે.

આ અકસ્માત ઉત્તર મહારાષ્ટ્રના જલગાંવ જિલ્લાના પચોરા શહેર નજીક માહેજી અને પરધાડે સ્ટેશનો વચ્ચે થયો હતો. લખનઉ-મુંબઈ પુષ્પક એક્સપ્રેસમાં આગ લાગી હોવાની અફવા ફેલાઈ હતી. પોતાનો જીવ બચાવવા માટે, મુસાફરો બાજુના પાટા પર કૂદી પડ્યા અને બેંગલુરુથી દિલ્હી જઈ રહેલી કર્ણાટક એક્સપ્રેસ સાથે અથડાઈ ગયા.

પ્રધાનમંત્રીએ શોકગ્રસ્ત પરિવારો પ્રત્યે સંવેદના વ્યક્ત કરી

પ્રધાનમંત્રી નરેન્દ્ર મોદીએ અકસ્માતમાં માર્યા ગયેલા મુસાફરોના પરિવારો પ્રત્યે સંવેદના વ્યક્ત કરી. પીએમઓએ એક X પોસ્ટમાં પીએમ મોદીએ લખ્યું, 'મહારાષ્ટ્રના જલગાંવમાં રેલ્વે ટ્રેક પર થયેલા દુ:ખદ અકસ્માતથી હું દુઃખી છું. હું શોકગ્રસ્ત પરિવારો પ્રત્યે સંવેદના વ્યક્ત કરું છું અને તમામ ઘાયલોના ઝડપી સ્વસ્થ થવા માટે પ્રાર્થના કરું છું. અધિકારીઓ અસરગ્રસ્ત લોકોને શક્ય તમામ મદદ પૂરી પાડી રહ્યા છે.

દરમિયાન, મહારાષ્ટ્રના મુખ્યમંત્રી દેવેન્દ્ર ફડણવીસે એક વીડિયો જાહેર કરીને આ અકસ્માત પર દુઃખ વ્યક્ત કર્યું છે. તેમણે કહ્યું, 'જલગાંવ જિલ્લાના પચોરા નજીક એક ખૂબ જ દુર્ભાગ્યપૂર્ણ ઘટનામાં લોકોએ જીવ ગુમાવ્યા, જે ખૂબ જ દુઃખદ છે, હું તેમને શ્રદ્ધાંજલિ અર્પણ કરું છું.' તેમણે આ દુર્ઘટનામાં માર્યા ગયેલા મુસાફરોના પરિવારજનોને 5 લાખ રૂપિયાના વળતરની જાહેરાત કરી.

કેન્દ્રીય ગૃહમંત્રી અમિત શાહે આ ઘટનાને અત્યંત દુઃખદ ગણાવી. તેમણે 'X' પર લખ્યું, 'મહારાષ્ટ્રના જલગાંવમાં થયેલો ટ્રેન અકસ્માત અત્યંત દુઃખદ છે. મેં આ સંદર્ભમાં મુખ્યમંત્રી દેવેન્દ્ર ફડણવીસ સાથે વાત કરી અને પરિસ્થિતિનો તાગ મેળવ્યો. સ્થાનિક વહીવટીતંત્ર ઘાયલોને શક્ય તમામ મદદ પૂરી પાડી રહ્યું છે. આ અકસ્માતમાં જીવ ગુમાવનારાઓના પરિવારો પ્રત્યે હું ઊંડી સંવેદના વ્યક્ત કરું છું અને ઘાયલો ઝડપથી સ્વસ્થ થાય તેવી કામના કરું છું.

રેલ્વે મંત્રી અશ્વિની વૈષ્ણવે શું કહ્યું?

કેન્દ્રીય રેલ્વે મંત્રી અશ્વિની વૈષ્ણવે પણ આ અકસ્માત પર દુઃખ વ્યક્ત કર્યું છે. રેલ્વે બોર્ડ દ્વારા જારી કરાયેલા એક નિવેદનમાં કહેવામાં આવ્યું છે કે, 'રેલ્વે મંત્રી અશ્વિની વૈષ્ણવે આ ઘટના પર ઊંડો શોક વ્યક્ત કર્યો છે.' તેમણે રેલવે બોર્ડના અધ્યક્ષ અને અન્ય અધિકારીઓ પાસેથી ઘટના વિશે સંપૂર્ણ માહિતી લીધી અને તમામ ઘાયલોની યોગ્ય સારવાર માટે નિર્દેશ આપ્યા. રેલવે બોર્ડે મૃતકોના પરિવારજનોને અલગથી 1.5 લાખ રૂપિયા, ગંભીર રીતે ઘાયલોને 50,000 રૂપિયાની સહાય આપી.