જમ્મુ-કાશ્મીર: ગુલમર્ગમાં સેનાના વાહન પર આતંકી હુમલો, 2 જવાન શહીદ, સર્ચ ઓપરેશન શરુ

કાશ્મીર ખીણમાં ગુલમર્ગ નજીક ગુરુવારે આતંકવાદીઓએ સેનાના એક વાહનને નિશાન બનાવ્યું હતું. આ હુમલામાં સેનાના બે જવાન શહીદ થયા છે. બે નાગરિક કુલીઓએ પણ જીવ ગુમાવ્યા છે.

samay mirror

October 25, 2024

1 minute

નેશનલ

કાશ્મીર ખીણમાં ગુલમર્ગ નજીક ગુરુવારે આતંકવાદીઓએ સેનાના એક વાહનને નિશાન બનાવ્યું હતું. આ હુમલામાં સેનાના બે જવાન શહીદ થયા છે. બે નાગરિક કુલીઓએ પણ જીવ ગુમાવ્યા છે. ત્રણ જવાનો ઘાયલ થયા છે, હોસ્પિટલમાં દાખલ થવાની સાથે સુરક્ષા દળોએ આતંકીઓને ખતમ કરવા માટે સર્ચ ઓપરેશન હાથ ધર્યું છે. કહેવામાં આવી રહ્યું છે કે બુટાપથરી ગુલમર્ગની પોસ્ટ પાસે આતંકીઓએ ઘૂસણખોરીનો પ્રયાસ કર્યો હતો. જેને સુરક્ષા દળોએ નિષ્ફળ બનાવ્યો છે.

આ હુમલાની માહિતી બારામુલા પોલીસે આપી છે. પોલીસનું કહેવું છે કે નાગિન પોસ્ટની આસપાસ બુટાપથરી સેક્ટરમાં સુરક્ષા દળો અને આતંકવાદીઓ વચ્ચે ગોળીબાર થયો હતો. જમ્મુ-કાશ્મીરના સીએમ ઓમર અબ્દુલ્લાએ આતંકી હુમલા પર શોક વ્યક્ત કર્યો છે. તેમણે કહ્યું, સેનાના વાહન પર હુમલાના સમાચાર ખૂબ જ દુર્ભાગ્યપૂર્ણ છે. હુમલામાં કેટલાક લોકો ઘાયલ થયા છે.

સીએમ અબ્દુલ્લાએ કહ્યું કે, કાશ્મીરમાં તાજેતરના હુમલાઓ ગંભીર ચિંતાનો વિષય છે. હું આ હુમલાની સખત નિંદા કરું છું. માર્યા ગયેલા લોકોના પ્રિયજનો પ્રત્યે મારી સંવેદના વ્યક્ત કરું છું. હું પ્રાર્થના કરું છું કે ઘાયલો સંપૂર્ણ અને ઝડપથી સ્વસ્થ થઈ જાય. જમ્મુ-કાશ્મીરના પૂર્વ મુખ્યમંત્રી મહેબૂબા મુફ્તીએ પણ શોક વ્યક્ત કર્યો છે.

તેણે સોશિયલ મીડિયા પ્લેટફોર્મ X પર એક પોસ્ટ કરી છે. તેણે કહ્યું, બારામુલ્લામાં સેનાના કાફલા પર થયેલા આતંકી હુમલાથી હું આઘાતમાં છું. આ હુમલામાં એક નાગરિક કુલીનું મોત થયું હતું. હું આની નિંદા કરું છું. ઘાયલ સૈનિકો ઝડપથી સાજા થાય તેવી પ્રાર્થના.

એક અઠવાડિયામાં પરપ્રાંતિય મજૂરો પર ત્રીજો હુમલો

આ પહેલા ગુરુવારે સવારે આતંકવાદીઓએ પુલવામાના ત્રાલમાં એક બિન-સ્થાનિક મજૂરને ગોળી મારી દીધી હતી. ગોળી તેના હાથમાં વાગી હતી. મજૂર ઉત્તર પ્રદેશનો રહેવાસી છે. આ હુમલા અંગે અધિકારીઓએ જણાવ્યું કે યુપીના બિજનૌરના રહેવાસી શુભમ કુમારને બાટાગુંડ ગામમાં આતંકવાદીઓએ ગોળી મારી દીધી હતી. ગોળી તેના હાથમાં વાગી હતી. તેને તાત્કાલિક સારવાર માટે હોસ્પિટલ લઈ જવામાં આવ્યો હતો. છેલ્લા એક સપ્તાહમાં ખીણમાં પરપ્રાંતિય મજૂરો પર આ ત્રીજો હુમલો છે.